భావలహరి

🄼🅈 🇩 🇦 🇩  🄸🅂 🄼🅈 🇭 🇪 🇷 🇴  ♥️ మా నాన్నే నాకు నారాయణుడు ♥️ జీవితమనే పంట భూమిలో, కష్టమనే హలాన్ని చేత బట్టి, సంసారమనే తడీ-పొడీ బీడు భూమిని సాగు చేసి, బాధ్యత, బరువు అనే చెమట ధారలతో కుటుంబ సేద్యాన్ని చేసి, తన ఆకలిదప్పులు లక్ష్య పెట్టక మా ఆకలి తీర్చిన నిస్వార్ధ నిత్య కర్షకుడు మా నాన్న! కొవ్వొత్తిలా కరిగినా, కష్టాలు చుట్టుముట్టినా, చిరునవ్వే ఆయుధంగా నా జీవిత ఆకాంక్షల మణిపూసలని ఒక్కొక్కటిగా కూర్చి, మాల లా అల్లి, నా మెడలో వేసిన సూత్రధారి మా నాన్న! "పదార్థంలో కాదు, యదార్థంలో జీవించండి" అని మాకు బోధ చేసిన మా నాన్నే, నాకు శ్రీరాముడు, శ్రీకృష్ణుడు, దశావతారుడైన నారాయణుడు! ~ అడుసుమల్లి రవి కుమార్  

ఇంత నీడ దుప్పటి, మీదేసి చెట్టు మౌనంగా కూర్చుంటుంది. చుట్టూ పరుచుకున్న నీడ మీద ఏడు రంగుల్ని కలగంటూ, ఆకుపచ్చదనంతో అబ్బుర పరుస్తుంది.  చెట్టు నీడన సేద దీరమంటూ ఏకాంతం కుక్క పిల్లై  వెంటపడుతుంది. అరుపుల్లేని ప్రేమలోకమొకటి పిట్టల గుంపై వచ్చి మీద వాలుతుంది. ఎండ నిట్టూర్పుల అలలు నీడ తీరంతో యుద్ధం చేస్తూ, చెట్టు మొదలుకు తలలు బాదుకుంటున్నాయి, హాయి లోకానికి స్వాగతం పలుకుతూ..! ~ అడుసుమల్లి రవి కుమార్ 

  ఇప్పటికైతే వట్టి మట్టి ముద్దవి మాత్రమే. కాలం జరిగాక..తవ్వి చూస్తే శిలగా మిగులుతావో, శిల్పమై ఎదురొస్తావో,శిలాజంగా దొరుకుతావో?!  పంచభూతాత్మకమైన నీవు ఎప్పటికి విజేతవే, నీ ప్రయత్నం లో ఓడిపోనంత వరకు! ~ అ. ర. కు