నీకు తెలుసా

నీకు తెలియదు కదూ!
.
వెచ్చని దుప్పట్లోంచి లేవంగానే
పేపర్రాలేదని విసుక్కుంటావు కానీ
పేపరేసే కుర్రాడికి రాత్రంతా జ్వరమున్నా
పొద్దున్నే చల్లో లేచాడని తెలియదు కదూ....
.
పాల పేకెట్ నీ కాఫీ టైంకి
అందట్లేదని చిందులేస్తావు కానీ
పాలు పంచే కుర్రాడికి అన్నంలో
మజ్జిగ నీళ్ళు కరువని నీకు తెలియదు కదూ....
.
ఎంత డబ్బు పోసినా బాత్రూం టైల్స్
మెరవట్లేదని చిర్రు బుర్రులాడతావు కానీ
నువు ఖరాబు చేసిన కమోడ్ కడిగే అమ్మాయి
తెల్లవారుఝామున ఆరుబయట చీకటిలో పడే
అవస్థ తెలియదు కదూ...
.
నీ డ్రైనేజీ బ్లాక్ అయితే పూడిక తీసే చేతులు
రెండుపూట్లా నోట్లోకెళ్తాయో లేదో కూడా
నీకు తెలియదు కదూ...
.
మానవత్వం అంటే ఎక్కడో దూరంగా ఉన్న
సిరియా శరణార్ధుల మీదో
నేపాల్ భూకంప బాధితుల మేదో
ఇజ్రాయిల్ సైన్యం హతమార్చే పాలస్థీనుల మీదో
చూపించే జాలేనా..........?
.
రెండు పూటలా ఒళ్ళు శుభ్రం చేస్కున్నా
మనసులోని కుళ్ళు కడగాలంటే
ముప్పైమునకలేసినా
పుష్కర గోదారికి మాత్రం సాధ్యమా?????????