కాలం

కాలం అంటే గడియారం ముళ్లు కాదు

గుండెలో నిండిన స్మృతుల శృతి - లయ!

అనుభవాల క్షణాలు

మనసు పొరల్లో జ్ఞాపకాలైపోతాయి.

ఒక చిరునవ్వో, ఒక కన్నీటి చుక్కో

కొలమానమై కాలం లోతుల్ని అన్వేషిస్తుంది.

ఒక దీపం ఆరిపోవచ్చు

అది పంచిన వెలుతురు జ్ఞానం శాశ్వతం.

ఒక శరీరం నశించిపోవచ్చు

అది ప్రసవించిన ప్రాణం పరంపరగా కొనసాగుతుంది.

కాలచక్రం నిన్నటి అశుభాల పీఠిక కారాదు

రేపటి ఆశల మణిదీపం కావాలి!

కాలం మరణించవచ్చు,

కాలాన్ని శ్వాసించిన అక్షరం అమరమౌతుంది...!

~ అడుసుమల్లి రవి కుమార్