జీవితం

​జీవితమంటే కదిలే నది
చైతన్యాన్ని అణువణువూ నింపుకున్న అంబులపొది
జీవితమంటే...
అనుభూతుల మాలిక...అనుభవాల వాహిక
ఆశల్నీ ఆశయాల్నీ చిత్రించుకుంటూ
కర్తవ్యాన్ని గుర్తుచేసుకుంటూ ముందుకు నడిచెయ్.!
​
పరిస్థితులకు ఎదురీది
​మార్గం చూపే అంతర గవాక్షం నీ మనసైతే
జీవితమిక
స్వేచ్ఛా విహంగమే.!

​కాలం ఎన్ని మానని గాయాల్ని సృష్టించినా
​బ్రతుకు చిత్రం ఎంత విచిత్రంగా మారినా
గుండె లోతుల్ని తడిమి పునర్జన్మను ప్రసాదించేది గుప్పెడు ధైర్యమే.!
​
పడిలేచే కడలి తరంగంలా ప్రతినిత్యం ఎగిసిపడుతూ..
మన లోపలి లోతుల్ని
ఆర్ద్రంగా కొలుస్తూనే అనునిత్యం జీవించెయ్.!