నీవే విజేతవు

విరిగిన అల
తిరిగి విశాల సముద్రమవుతుంది .

చెదిరిన కల
కఠోరవాస్తవాన్ని రుచి చూపిస్తుంది .

పగిలిన జీవితవిత్తు
కొత్త జీవమై మొలకెత్తుతుంది .

దేహం గాలిని పీలుస్తున్నట్టే
జీవితం అణుక్షణం
అత్యవసరంగా ఆశని పీలుస్తుంది .

ఎప్పుడైనా నిన్ను
లోకం తృణీకరిస్తే....సంఘం నిరాదరిస్తే
నీవు నిన్ను కావలించుకోగలిగితే
నీవే విజేతవు...కాదు కాదు జగజ్జేతవు!

~ అడుసుమల్లి రవి కుమార్