ప్రేమ

నాజ్ఞాపకం
నీ మదిలో మెదిలినపుడు
నీ పెదాలపై నవ్వు మెరవాలి .

నేననే ఊహ
నిన్ను కదిపినపుడు
నీ జీవితం తేలికవ్వాలి .

నా మాటొకటి
నీ చెవుల్లో మెదిలినపుడు
నీ భుజంపై నా చెయ్యి
స్పర్శలోకి రావాలి .

నునివెచ్చని ఉదయసమీరం
నీ తనవుని తాకినపుడు
నా రూపం నీహృదయంలో ప్రతిబింబించాలి .

' మనం ' అనే మిధునం
గతంలోంచి నిన్ను తొంగి చూసినపుడు
వర్తమానంలో నీ శూన్యం భర్తీ కావాలి .

జీవితసార్ధకత
నీ అస్థిత్వాన్ని ప్రశ్నించినపుడు 
నువ్వు మన ప్రేమని ఋజువుగా చూపగలగాలి .

ప్రియులు తమ మాటల్లో
నన్ను తలచినపుడు
నీ గుండె గర్వంతో ఉప్పొంగాలి .

సుదూర తీరాల ఆహ్వానాన్ని
నేను స్వీకరించే లోపు .,
నాదన్నది ప్రేమగా నీకు అర్పించాలి.